Молдова бош штабининг собиқ бошлиғи Россияга жосуслик қилгани маълум бўлди
Бу ҳақида Тhe Insider ва Молдованинг “Маленькая страна” нашри қўшма суриштурувида айтилди.
Молдова Қуролли Кучлари Бош штабининг собиқ бошлиғи Игор Горган Россия Федерацияси ҳарбий разведкасига (ГРУ) республикадаги ички сиёсий вазият тўғрисида ҳисоботлар ва Украина Мудофаа вазирлиги вакилларининг ташрифлари ҳақидаги маълумотларни узатиб турган.
Бундан ташқари, суриштирув материалида таъкидланганишича, Горган ўзининг ГРУдаги куратори Алексей Макаровга Молдовада ҳамма нарса гўёки рус қўшинларининг мамлакатга киришига тайёрлиги ҳақида хабарлар юборган.
Ҳарбий разведка манбасининг тахмин қилишича, Горган 2004 йилда НАТОнинг Босния ва Герсеговина, Грузия ва Ироқдаги халқаро миссияларида хизмат қилган вақтида рус махсус хизматлари томонидан ёлланган. 2021 йилда Молдова президенти Майя Санду уни Бош штаб бошлиғи лавозимидан озод қилган. 2023 йилда Горган БМТнинг Кишинёвдаги қочқинлар масалалари бўйича ваколатхонасига ишга жойлашган. Горган Молдова Мудофаа вазирлигидаги эски алоқаларидан фойдаланиб, ГРУ учун муҳим маълумот етказувчи бўлиб қолмоқда, деб ёзади Тhe Insider.
Тергов ҳаракатлари бошлангач, Молдова президенти маъмурияти раҳбари Адриан Балутел Игор Горганнинг давлат мукофотлари ва ҳарбий унвонлари бекор қилинишини маълум қилди.
"Ватанга хиёнат ва давлатга қарши бундай жиноятларни амалга оширган шахслар энг оғир турдаги жазо билан жазоланиши керак. Молдовага давлатга хиёнат ва жосуслик жиноятларига қарши курашда самаралироқ воситалар керак", — дея таъкидлади Балутел.
