Путин 24 йил ичида илк бор Шимолий Кореяга ташриф буюрди
Россия президенти Владимир Путин 18 июнь куни давлат ташрифи билан Пхеньянга борди. Бу ҳақида Кремль матбуот хизмати хабар берди.
Россия ва Шимолий Корея ўртасидаги икки томонлама муносабатларнинг бутун тарихи давомида бу Путиннинг Пхеньянга 2000 йилдан кейинги биринчи ташрифи ҳисобланади. Путиннинг Шимолий Кореяга ташрифи икки кун давом этади, асосий учрашув 19 июнга белгиланган. Чоршанба куни турли форматларда музокаралар режалаштирилган, энг муҳими Россия ва КХДР раҳбарларининг юзма-юз учрашувидир.
Ташрифнинг расмий қисми 19 июнь куни тушда Путин ва Ким Чен Иннинг учрашув маросими билан бошланади. Анъанага кўра, Россия ва КХДР мадҳиялари янграйди, фахрий қоровул саф тортади, давлат раҳбарларига икки давлат делегациялари таништирилади. Кейин қароргоҳда Россия — Корея музокаралари бошланади.
Россия президентининг ёрдамчиси Юрий Ушаков ташриф дастурида жуда қизғин, музокаралар, энг муҳими, Путин ва Ким Чен Ин ўртасида норасмий яккама-якка мулоқот кўзда тутилганини айтди.
Куннинг иккинчи ярмида қўшма ҳужжатлар имзоланиши режалаштирилган, музокаралар якунида Россия президенти ва КХДР етакчиси матбуот учун баёнот беради.
Энг муҳим ҳужжатлардан бири бу Россия ва КХДР ўртасидаги кенг қамровли стратегик шериклик тўғрисидаги янги шартномадир. Битим Россия ва Шимолий Корея ўртасида 1961, 2000 ва 2001 йилларда имзоланган фундаментал ҳужжатлар ўрнини эгаллайди.
Ушаковнинг сўзларига кўра, янги шартнома "дунё ва минтақадаги геосиёсий вазиятнинг чуқур эволюцияси, шунингдек, сўнгги пайтларда икки томонлама муносабатларда юз берган сифатли ўзгаришлари билан белгиланади".
У янги шартнома ҳарбий-техник соҳадаги ҳамкорликни назарда тутадими ёки йўқлигига аниқлик киритмаган.
