Байден америкаликларга мурожаат қилмоқчи
Америка президенти аҳолига пойгани тарк этиш қарори сабабларини тушунтириш ниятида.
Байден 25 июль куни Тошкент вақти билан соат 5:00 да америкаликлар олдида нутқ сўзлайди. У ўзини нима кутаётгани ва "Америка халқи учун ишни қандай тугатиши" ҳақида гапиради.
Бу президентлик пойгасидан чиқишини эълон қилганидан кейин давлат раҳбари иштирокидаги биринчи оммавий тадбирдир.
Сайлов пойгасидан чиқишдан бироз олдин, Байден ковид билан касалланган эди. Сиёсатчи оммавий тадбирларни бекор қилди ва Дэлавер штатидаги уйида ўзини изоляция қилди. Президент 23 июль куни ишга қайтди.
Байденнинг ўзи қайта сайланишдан воз кечиш қарорини эълон қилган куни америкаликлар олдида нутқ сўзлаш ниятида эканини маълум қилди. Бу ҳақда ижтимоий тармоқдаги саҳифасида эълон қилинган баёнотида айтилган. Президент нутқ шу ҳафта бўлиб ўтишини таъкидлади.
Кейинроқ NBC телеканали манбаларга таяниб, Байден ва унинг ёрдамчилари нутқ тайёрлаётгани, унда у америкаликларга пойгадан чиқиш қарори сабабларини тушунтириш ниятида экани ҳақида хабар берди.
