Исроил ҲАМАСнинг янги раҳбарига ўлим билан таҳдид қилди
Яҳё Синвар ҲАМАСнинг энг кўп қидирилаётган етакчилари рўйхатида.
Гуруҳнинг 2023 йил октябр ойида Исроилга уюштирган йирик теракти ташкилотчиси саналган 61 ёшли Яҳё Синвар Фаластиннинг ҲАМАС ҳаракати янги сиёсий раҳбари этиб тайинланди. ҲАМАС Синварнинг сиёсий бюро раҳбари этиб сайланганини 6 август, сешанба куни, бу лавозимдаги ўзидан аввалги Исмоил Ҳания Теҳронда ўлдирилганидан бир ҳафта ўтиб эълон қилди.
Синвар ҲАМАС сиёсий бюроси раҳбари этиб тайинлангач, Исроил ташқи ишлар вазири Израэл Кац уни тезроқ йўқ қилишга чақирди.
"Исмоил Ҳания ўрнига бош террорчи Яҳё Синварнинг ҲАМАС янги раҳбари этиб тайинланиши уни тезроқ йўқ қилиш ва бу ёвуз ташкилотни Ер юзидан йўқ қилиш учун яна бир яхши сабабдир", — деб ёзди у.
Гуруҳнинг Исроилга ҳужумидан сўнг Яҳё Синвар омма олдида кўринмай қолган ва Ғазо сектори остидаги ерости туннелларида яширинган деб тахмин қилинади.
