Қозоғистон собиқ ички ишлар вазирига суд ҳукми ўқилди
Бу ҳақида Остона жиноят ишлари бўйича туманлараро суди хабар берди.
"Суд ҳукми билан Эрлан Турғумбоев айбдор деб топилиб, 5 йилга озодликдан маҳрум этилди", — дейилади ҳукмда. Шунингдек, судланувчи 10 йилга муайян лавозимларни эгаллаш ҳуқуқидан маҳрум қилинган.
Хабарда қайд этилишича, Турғумбоевга нисбатан коррупция жинояти аломатлари бўлмагани учун унинг жазоси шартли деб ҳисобланади. Суд маҳкумнинг ўз айбига иқрор бўлиши ва чин дилдан пушаймонлигини инобатга олганини таъкидлади.
Собиқ ички ишлар вазирининг Қозоғистонда қўлга олингани апрель ойи охирида маълум бўлган эди. Турғумбоев 2022 йилнинг январь ойидаги оммавий тартибсизликлар пайтида мансаб ваколатини суиистеъмол қилганликда айбланган ва бу оғир оқибатларга олиб келган.
Қозоғистонда ўша даврда беш мингдан ортиқ тартибсизлик иштирокчиси қўлга олинган.
