Эрон соя ва буғдой эвазига Россияга дрон ва ракеталар топширганини тан олди
Бу билан Россия Эронга санкцияларни четлаб ўтишда ёрдам бермоқда.
Эрон парламентининг хавфсизлик ва ташқи алоқалар қўмитаси аъзоси Аҳмад Бакшаиш Ардестоний “Дидбан Иран” нашрига берган интервьюсида Теҳрон Москвани "иқтисодий ва сиёсий ҳамкорлик доирасида" дронлар ва ракеталар билан таъминлаётганини тасдиқлади.
"Биз Россия Федерациясидан кўплаб товарларни импорт қиламиз. Эҳтиёжларимизни қондириш учун соя ва буғдойни айирбошлашимиз керак. Бунинг бир қисми ракеталарни юборишни ўз ичига олса, бошқа қисми ҳарбий дронларни юборишни ўз ичига олади", — деди Ардестоний.
Аввалроқ бир қатор Ғарб ОАВлари Эроннинг Fath-360 қисқа масофали баллистик ракеталари аллақачон Россия Федерацияси ҳудудига етказилгани ҳақида хабар берган эди. Украина Ташқи ишлар вазирлиги ушбу маълумотдан чуқур хавотирдалигини билдириб, халқаро ҳамжамиятни дунёда тинчлик ва хавфсизликни ҳимоя қилиш доирасида Россия ва Эронга босимни кучайтиришга чақирди.
