Украина қурол ишлаб чиқаришни кўпайтирмоқда
Бу мамлакатнинг Ғарб ҳарбий ёрдамига боғлиқлигини камайтиради.
Америка урушни ўрганиш институти маълумотига кўра, Украина маҳаллий қурол ишлаб чиқаришни кенгайтириш ва учувчисиз тизимлар соҳасида Россиядан устунлигини сақлаб қолиш бўйича саъй-ҳаракатларини давом эттирмоқда.
Украина президенти Владимир Зеленский 1 октябр куни Украина компаниялари ҳозирда йилига 4 миллион дрон ишлаб чиқариши мумкинлигини айтди, расмийлар эса ҳозиргача 1,5 миллион дона дрон ишлаб чиқариш бўйича шартнома имзолаган.
Россия президенти Владимир Путин яқинда Россия 2024 йилда дрон ишлаб чиқариш ҳажмини 10 баробарга ошириб, 1,4 миллион донага етказишни режалаштираётганини айтди.
Зеленский, шунингдек, Украина ҳар ой 15 та "Богдан" ўзиюрар артиллерия тизимини ишлаб чиқариши мумкинлигини таъкидлади.
Украина мудофаа вазири Рустем Умеровнинг баёнотларига кўра, Украина дронлар ва узоқ масофали ракеталар, жумладан баллистик ракеталарни маҳаллий ишлаб чиқаришга устувор аҳамият беришда давом этмоқда.
ISW ҳисоб-китобларига кўра, Украинанинг маҳаллий ишлаб чиқаришни кенгайтириш борасидаги саъй-ҳаракатлари узоқ муддатда унинг Ғарб ҳарбий ёрдамига боғлиқлигини камайтиради, бироқ ҳозирча Киев ҳимояланиш учун ҳамон Ғарбнинг муҳим ёрдамига муҳтож.
