Исроил Байрут жанубига янги ҳужум уюштирди
Зарбалар камида ярим соат давом этган.
Ўтган тунда Исроил Байрутнинг жанубий қисмига йирик ракета ҳужумларини уюштириб, Ҳизбуллоҳ инфратузилмасига зарба берди.
Reuters нашрининг гувоҳларга таяниб хабар беришича, зарбалар камида ярим соат давом этган.
BBC нашрининг Байрутдаги мухбири шаҳар ичида камида олтита йирик портлаш содир бўлганини, улар орасида осмонда учаётган дронларнинг овози эшитилганини хабар қилди. Нашр журналистининг қайд этишича, зарбалардан бири ёқилғи қуйиш шохобчасига тегган.
Исроил мудофаа кучлари “Байрут ҳудудидаги Ҳизбуллоҳ билан боғлиқ нишонларга ҳужум қилаётганини” тасдиқлади. Аввалроқ ЦАХАЛ яқинда бериладиган зарбалар ҳақида огоҳлантириб, ҳудудда қолган аҳолини эвакуация қилишга чақирган эди.
Бу охирги 24 соат ичида Ҳизбуллоҳнинг таянчи ҳисобланган Байрутнинг жанубий ҳудудларига Исроилнинг иккинчи йирик ҳужуми бўлиб, гуруҳ бунга жавобан Исроил ҳудуди томон ракеталар отган.
