Агар Россияга қайтсам, президентликка номзод сифатида қатнашаман — Юлия Навалная
Унинг сўзларига кўра, Алексей Навалнийнинг Россия колониясида вафот этишидан бир кун олдин унга эрининг яқинда озод этилиши айтилган.
22 октябрь куни Алексей Навалнийнинг “Патриот” китоби бир вақтнинг ўзида 26 тилда, жумладан, рус тилида ҳам нашр этилади. Бу сиёсатчининг автобиографияси ва унинг 2021 йил январ ойида Шереметево аэропортида ҳибсга олинганидан кейин қамоқхонада ёзган кундаликларининг жамланмасидир. Навалний бу кундаликларни 2024 йил 16 февралда Харп қишлоғидаги колонияда вафот этгунига қадар ёзган. Китоб чиқиши арафасида унинг рафиқаси Юлия Навалная BBC'га интервью берди.
Навалная турмуш ўртоғини йўқотиш қайғусини енгишда унга нима ёрдам бераётганини, келажагини қандай кўришини айтди ва ватанига қайтгач, Россия президентлигига номзодини қўйиш режасини маълум қилди.
"Мен Путиннинг Россия “подшоҳлиги”дан рус қамоқхонасининг оддий маҳбусига айланишини истайман", — деди Юлия Навалная интервьюда.
Унинг сўзларига кўра, Алексей Навалнийнинг Россия колониясида вафот этишидан бир кун олдин унга эрининг яқинда озод этилиши айтилган: "Мен Путин билан музокаралар олиб борилганида, у доимо ёлғон гапираётганини биламан. Биз алмашинувга жуда яқин эканлигимизни ҳам, лекин ҳаммаси бир кунда ўзгариши мумкинлигини ҳам билардим".
