Зеленский НАТОга таклиф қилинишини кутмоқда
Бу ҳақида “Европейская Правда” нашри маълум қилди.
"Президент Зеленский Ғарб ҳамкорларидан Украинага халқаро тан олинган чегаралар доирасида НАТОга аъзо бўлиш таклифини юборишларини кутаётганини айтди", — деб ёзмоқда “Европейская Правда” нашри.
Зеленский “қандай йўлни босиб ўтганлигидан қатъий назар” қонуний жиҳатдан “ҳеч ким босиб олинган ҳудудларни бошқа давлатлар ҳудуди деб тан олмаслигини” таъкидлади.
"Нега мен таклиф масаласига урғу беряпман? Чунки у мамлакатга халқаро тан олинган чегаралар доирасида берилади. Бу эса мен учун энг муҳими: уруш пайтида таклиф олиш... Бу шунчаки таклиф эмас, балки уруш ҳали тугамаган пайтдаги таклиф бўлиши керак", — деди Украина президенти.
Зеленский Украина Шимолий Атлантика альянсига қандай шароитда қўшилиши ва жараён қанча давом этиши ҳақидаги саволга “турли форматлар бўлиши мумкин”, дея жавоб қайтарди.
Унинг таъкидлашича, Украина босиб олинган ҳудудлар эвазига НАТОга аъзо бўлиш масаласини муҳокама қилмаяпти.
