Филиппинга "Торажи" тўфони ёпирилди

Филиппинга "Торажи" тўфони ёпирилиши оқибатида 2,5 минг киши эвакуация қилинди, портлар ёпилди. Бу мамлакатда бир ой ичида кузатилган тўртинчи тўфон ҳисобланади. Бундан олдинги табиий офатлар оқибатида 159 киши ҳалок бўлганди. 

 

Қайд этилишича, тўфон Филиппин пойтахти Маниладан 220 километр жануби-шарқдаги Диласаг шаҳри яқинига ёпирилган. Миллий метеорология агентлиги ҳозирча қурбонлар ёки жароҳат олганлар ҳақида хабар бергани йўқ.

 

Диналунган шаҳри фуқаролик мудофааси бошлиғи Мервини Паблеонинг сўзларига кўра, соҳилда кучли шамол ва сув тошқинлари бошланган. Дарахтлар қулаши оқибатида кечадан бери электр энергияси таъминотида узилишлар кузатилмоқда.

 

Таъкидланишича, шамолнинг максимал тезлиги соатига 130 километрга етмоқда. Табиий офат шимоли-ғарбий йўналишда ҳаракатланиб, Жанубий Хитой денгизи ҳудудига кириши прогноз қилинган. Тўфон оқибатида айрим ҳудудларда мактаблар ва ҳукумат муассасалари ёпилган.

 

Октябрь охирларида Филиппинга ёпирилган "Трами" тропик тўфони натижасида юзага келган сув тошқинлари ва кўчкилар оқибатида ҳалок бўлганлар сони 110 кишига етганди.

 

Маълумот ўрнида: Филиппинда 7 мингга яқин ороллар мавжуд бўлиб, у ерга ҳар йили 20 га яқин тўфон ёпирилади. "Трампи" 2024 йил бошидан бери кузатилган 11-тўфон ҳисобланади.