Франциядаги музейдан 7 млн евролик заргарлик буюмлари ўғирлаб кетилди
Ўғирлик содир этилган вақтда музейда 20 нафар ташриф буюрчи ва муассаса ходимлари бўлган.
Қуролланган босқинчилар Франциянинг Парай-ле-Мониа комуннасидаги музейдан миллий бойлик сифатида тан олинган қарийб 7 миллион евролик заргарлик буюмларини ўғирлаб кетди.
Комунна мэри Жан-Марк Несменинг сўзларига кўра, ўғирланган буюмлар парижлик заргар Жозеф Шоме томонидан 1904 йилда яратилган Via Vitae («Ҳаёт тарзи») экспонатининг бир қисми ҳисобланади. Композиция бриллиантлар ва бошқа қимматбаҳо тошлар, мармар, олтин ва фил суяги билан безатилган 138 та бўлакдан иборат. Санъат намунасида Исо Масиҳнинг ҳаёт босқичлари тасвирланган.
Қайд этилишича, ўғирлик 21 ноябрь куни кундузи содир бўлган. Босқинда тўрт киши иштирок этган: уч нафари музейга кирган, бир нафари ташқарида турган. Аввалига жиноятчилар ҳавога ўқ узган, кейин эса экспонат сақланган ҳимоя ойнасида тешик ҳосил қилган. Шундан сўнг улар тешик орқали тилла буюмлар ва фил суяклари, шунингдек, зумрад билан безатилган тақинчоқларни чиқариб олган.
Заргарлик буюмларини қўлга киритган ўғрилар мототциклларга ўтириб, жандармлардан беркинган.
"Бу Парай-ле-Мониа ва мамлакат мероси учун улкан йўқотиш", — дейди мэр.
Ўғирлик содир этилган вақтда музейда 20 нафар ташриф буюрчи ва муассаса ходимлари бўлган, уларнинг ҳеч бирига шикаст етмаган.
Маълумотларга кўра, Франциядаги ушбу музейдан 2017 йилда олтиндан ясалган иккита тож ҳам ўғирлаб кетилган.
