Қозоғистонда келин ўғирлаганлик учун жазо кучайтирилади
Бу ҳақида Парламент спикери вакили маълум қилди.
Қозоғистонда келин ўғирлаш ҳолатларига қарши жазони кучайтирувчи қонунчилик тузатишлари тайёрланмоқда. Парламент спикери Эрлан Кошановнинг маълум қилишича, президент Қосим-Жўмарт Тўқаевнинг Миллий қурултойдаги топшириғига биноан, бундай ҳолатларга жиддий ҳуқуқий баҳо бериш режалаштирилган.
Тўқаев март ойидаги чиқишида келин ўғирлашни «хурофот» деб атаган ва бу амалиётни прогрессив жамиятнинг қадриятларига зид, деб баҳолаган. Президент ҳар бир шахснинг ҳуқуқ ва эркинликлари устувор эканини таъкидлаб, келин ўғирлашга қонун доирасида чек қўйиш зарурлигини айтган.
Шунингдек, феврал ойида Инсон ҳуқуқлари бўйича комиссар Артур Ластаев Чимкентдаги келин ўғирлаш билан боғлиқ шов-шувли ҳодиса ҳақида баёнот берганди. Унинг таъкидлашича, мажбуран турмушга чиққан қизлар кўпинча жисмоний ва руҳий зўравонлик қурбонига айланмоқда.
