Грузиядаги курортда 12 киши ўлик ҳолда топилди
Уларнинг барчаси бахтсиз ҳодиса қурбони бўлган.
Гудаури қишлоғидаги машҳур тоғ-чанғи курорти ҳудудида жойлашган ҳинд ресторанининг иккинчи қаватидаги ётоқхоналарда 11 нафар хорижлик ва бир Грузия фуқаросининг жасади топилди. Ҳалок бўлганлар катта эҳтимол билан ушбу ресторан ходимлари бўлишлари мумкин.
Суд-тиббиёт экспертлари жасадларда зўравонлик белгиларини топмаган. Терговнинг дастлабки версиясига кўра, 12 кишининг барчаси бахтсиз ҳодиса қурбони бўлган. Тахминларга кўра, ўлим сабаби углерод оксиди билан заҳарланиш бўлиши мумкин. Ходимларнинг ётоқхоналари ёнидаги коридорда электр таъминотидаги узилишлар туфайли генератор ишлаётган бўлган. Полиция “эҳтиётсизлик оқибатида ўлимга сабаб бўлиш” моддаси бўйича тергов бошлади.
