Ҳиндистоннинг собиқ бош вазири вафот этди
У 10 йил давомида ҳукуматни бошқарган.
Ҳиндистоннинг собиқ бош вазири Манмоҳан Сингҳ 92 ёшида вафот этди. Бу ҳақида Reuters агентлиги хабар берди.
Манмоҳан Сингҳ 2004 йилги сайловлардан кейин биринчи марта бош вазир бўлган, 2009 йилда яна бу лавозимни эгаллаган. 2014 йилда Сингҳ ўзи вакиллик қилган “Ҳиндистон миллий конгресси” партияси парламент сайловларида мағлуб бўлганидан кейин истеъфога чиққанини эълон қилган.
“Сингҳ Ҳиндистоннинг мисли кўрилмаган иқтисодий ўсишга эришишига сабабчи бўлган ва юз миллионлаб одамларни даҳшатли қашшоқликдан олиб чиққан”, деб ёзади Reuters.
Ҳиндистон ҳукумати собиқ бош вазир Манмоҳан Сингҳ хотирасига етти кунлик мотам эълон қилди.
