Қозоғистонда 40 га яқин машина аварияга учради
Бунга об-ҳаво ёмонлашгани сабаб бўлган.
Қозоғистоннинг Оқмўла вилояти Остона—Шучинский трассада ноқулай об-ҳаво туфайли 40 га яқин автомобиль тўқнашди. Бу ҳақида Tengrinews хабар берди.
Ҳодиса соат 13:30 ларда Биржансал туманининг Кўгам ва Қаратал қишлоғи ўртасида юз берган. Об-ҳаво шароити ёмонлашгани (бўрон, кўриш чеклангани) сабабли 40 га яқин автомашина тўқнашган. Жабрланганлар ва қурбонлар ҳақида ҳозирча маълумот йўқ.
Воқеа жойида полиция ва фавқулодда вазиятлар хизмати ходимлари ишламоқда. Автомобильларни эвакуация қилиш ва йўл ҳаракати хавфсизлигини таъминлаш ишлари олиб борилмоқда.
