АҚШ Хитойнинг 37 та компаниясига санкция киритди
Бу Хитойда мажбурий муҳнатдан фойдаланиш билан боғлиқ.
АҚШ ички хавфсизлик вазирлиги (DHS) Хитойда мажбурий меҳнатдан фойдаланишни тақиқлашга қаратилган қонун (UFLPA) доирасида яна 37 та Хитой компаниясини маҳсулот импорти тақиқланган ишлаб чиқарувчилар рўйхатига киритди.
2022 йилда тузилган мазкур рўйхатда энди жами 144 та корхона мавжуд. Санкциялар текстиль, қуёш панеллари ишлаб чиқарувчилари ва тоғ-кон саноати компанияларини қамраб олади. Улар орасида Zijin Mining Group, Donghai JA Solar Technology, Hongyuan Green Energy ва Huafu Fashion компаниялари, шунингдек, ушбу компаниянинг 25 та шўъба корхонаси бор.
2022 йил июнида кучга кирган UFLPA қонуни Хитой, хусусан, Синжон-Уйғур мухтор вилоятида мажбурий меҳнат ва инсон ҳуқуқлари бузилишларига қарши курашишни мақсад қилган.
Ушбу қонун қабул қилиниши натижасида кўплаб компаниялар ўз маҳсулот етказиб бериш тармоқларини қайта текширишга мажбур бўлди. АҚШ божхона ва чегара назорати хизмати маълумотларига кўра, қонун қабул қилинганидан буён умумий қиймати $3,68 миллиардга тенг маҳсулотлар мамлакатга киритилиши тақиқланган ёки тўхтатилган.
Мазкур чора-тадбирлар Хитойнинг ишлаб чиқарувчи компаниялари маҳсулотлари халқаро бозорга чиқиш жараёнига жиддий таъсир кўрсатиши кутилмоқда.
Камола Одилова тайёрлади
