Ер юзида ҳалокатли мегазилзила кутилмоқда
Унда қурбонлар сони 320 мингдан ошиши мумкин.
Геологлар ва сейсмологларнинг тахминига кўра, кейинги энг катта зилзила яқин ўн йилликларда содир бўлиши мумкин.
Геологлар ва сейсмологлар яқин 30 йил ичида Ер юзида ҳалокатли мегазилзила содир бўлиши эҳтимолини 80 фоиз деб баҳоламоқда. Бу зилзила Япониянинг энг катта ороли Хонсю жанубидан ўтувчи 900 километр узунликдаги Нанкай жарлигида юз бериши мумкин. Илмий маълумотларга кўра, бу ҳудудда 79 йил аввал 8,1 магнитудали зилзила содир бўлган ва бу табиий офат катта талафотларга олиб келган эди.
Нанкай жарлиги Евросиё ва Филиппин тектоник плиталарининг тўқнашган ҳудуди бўлиб, сейсмик фаолликнинг марказий нуқтаси ҳисобланади. Бу ерда плиталарнинг бир-бирига ботиши натижасида улкан миқдордаги энергия ажралиб чиқади. Олимлар таъкидлашича, ушбу ҳудудда содир бўлиши кутилаётган мегазилзила олдинги офатлардан ҳам каттароқ талафот келтириши мумкин.
Эслатиб ўтамиз, 1946 йилги зилзилада 1362 киши ҳалок бўлган, 36 мингдан ортиқ уй вайрон бўлган, ва цунамилар 6 метргача баландликка етган эди.
Нанкай жарлигидаги эҳтимолий зилзиланинг кучи 2011 йилдаги Буюк шарқий Япония зилзиласидан ҳам каттароқ бўлиши, қурбонлар сони эса 320 мингдан ошиши мумкинлиги тахмин қилинмоқда. Япон ҳукуматининг фикрича, ушбу жараёнга қарши кураш стратегияси миллий хавфсизликнинг асосий йўналишларидан бири бўлиб қолмоқда.
Мутахассислар ушбу ҳудуддаги зилзилалар статистик жиҳатдан ҳар 90-150 йилда содир бўлишини айтмоқда. Бироқ замонавий технологиялар ва кузатувларга қарамай, зилзила вақтини олдиндан аниқ айтиш ҳалигача мушкул вазифа бўлиб қолмоқда.
