Туркияда ёниб кетган меҳмонхона бузилмоқда
Ҳодиса оқибатида 79 киши ҳалок бўлганди.
Туркия ҳукумати ёнғин пайтида 79 киши ҳалок бўлган Grand Kartal меҳмонхонасини бузишга қарор қилди.
Қарор бинони текшириш натижаларини олгандан кейин қабул қилинди. Мутахассисларнинг таъкидлашича, меҳмонхонанинг асосий юк кўтарувчи устунлари жиддий шикастланган ва бино яроқсиз ҳолга келган. Кейинчалик ҳудудни қайта ташкил этиш ва бошқа мақсадларда фойдаланиш режалаштирилган. Маълумотларда кўра, бузилишнинг бошланиш вақти яқин кунларда эълон қилинади.
Эслатиб ўтамиз, Туркиянинг Болу провинциясидаги тоғ-чанғи курортида жойлашган меҳмонхонада ёнғин 22 январга ўтар кечаси содир бўлганди. Мамлакат ички ишлар вазири Али Ерликайнинг сўзларига кўра, 12 қаватли ёғоч меҳмонхонанинг ресторан қисмида ёнғин содир бўлган. Ўт ўчирувчилар воқеа жойига тахминан 40-45 дақиқадан сўнг етиб келишган ва узоқ вақт давомида оловни ўчира олишмаган.
Одамлар эвакуация қилинган, баъзилари деразадан сакраб омон қолишга ҳаракат қилишган. Ёнғин оқибатида жами 79 киши ҳалок бўлди ва 51 киши яраланган.
Комила Одилова тайёрлади
