Қирғизистонда масжид ёниб кетди
Ёнғин масжиднинг ошхона қисмида юзага келган.
24 январь куни кечқурун Қирғизистоннинг Сокулук қишлоғида жойлашган масжидда ёнғин чиқди. Бу ҳақида Қирғизистон Фавқулодда вазиятлар вазирлиги (ФВВ) матбуот хизмати хабар берди.
Ёнғин ҳақида маълумот 20:28 да Сокулук тумани Ички ишлар бўлимига етиб келган. 4 та ёнғин-бригадаси воқеа жойига жалб этилган. Соат 21:00 да Чуй вилояти ФВВ бошқармаси бошлиғи Акжол Усен бошчилигидаги тезкор гуруҳ воқеа жойига етиб келган.
Текширув давомида ёнғин электр иситгичининг қисқа туташуви сабабли келиб чиққани аниқланган. Ёнғин масжиднинг ошхона қисмида юзага келган ва бинонинг тўлиқ ёниб кетишига олиб келган.
Ҳодиса оқибатида ҳеч ким жабрланмаган. Ҳозирда дастлабки суриштирув ишлари олиб борилмоқда.
Комила Одилова тайёрлади
