Хитойда махфий ҳарбий марказ қурилмоқда

Пекиннинг ғарбий қисмида Хитой Халқ-озодлик армиясининг янги ҳарбий қўмондонлик маркази – “Пекин ҳарбий шаҳри” барпо этилмоқда. Қурилиш майдони тахминан 607 гектарни ташкил этади.

 

Асосий қурилиш ишлари 2024 йил ўрталарида бошланган бўлиб, бу лойиҳа Хитой Халқ-озодлик армиясининг 2027 йилдаги юз йиллик юбилейига тайёргарлик доирасида амалга оширилмоқда. АҚШ разведка хизматлари маълумотларига кўра, Хитой раҳбари Си Сзинпин армияни ушбу санага қадар Тайванга ҳужум қилиш салоҳиятига етказиш бўйича кўрсатма берган.

 

Манбаларга кўра, янги марказнинг кенг кўламли инфратузилмаси ва қисман ер остига жойлаштирилиши уни ҳарбий можаролар даврида асосий қўмондонлик пункти сифатида ишлатишга мўлжалланганидан далолат беради.

 

Хитойлик тадқиқотчиларнинг фикрига кўра, объект махфий ҳарбий марказ белгиларига эга бўлиб, мустаҳкамланган бетон конструкциялар ва чуқур ерости туннеллари билан жиҳозланган. Унинг ўлчами Пентагонникидан деярли ўн баробар катта бўлиб, бу Хитойнинг ҳарбий қудратини ошириш борасидаги стратегик мақсадларини акс эттиради.

 

Тайван Мудофаа вазирлигига яқин манбалар ҳам ушбу янги қўмондонлик маркази қурилаётганини тасдиқлаган, бироқ баъзи мутахассислар бу ҳудуднинг ерости бункерлари учун мос келишига шубҳа билан қарамоқда.

 

Комила Одилова тайёрлади