Испаниялик дипломат мажлисда ухлаб қолгани учун ишдан олинди
Бунга дипломатлар ассоциацияси норозилик билдирган.
Испаниянинг Бельгиядаги элчихонаси раҳбари Алберто Антон мамлакат ташқи ишлар вазири Хосе Мануэл Албарезнинг чиқиши пайтида ухлаб қолгани сабабли лавозимидан озод қилинди.
Мазкур ҳолат акс этган видео ижтимоий тармоқларда кенг тарқалиб, Албарезнинг эътиборига тушган. Шундан сўнг, дипломат ишдан бўшатилган.
Бу қарор Испания Дипломатлари Ассоциациясининг норозилигига сабаб бўлди. Ташкилот мамлакат ташқи ишлар вазирига йўллаган мактубида дипломатик тайинловларда шаффофликни таъминлашни талаб қилди.
Хосе Мануэл Албарез ўзининг қатъий раҳбарлик услуби билан танилган бўлиб, Испания матбуоти уни “Кичик Наполеон” деб атай бошлади. У илгари ҳам қатор ходимларни хатолари ёки сиёсатга зид ҳаракатлари учун ишдан бўшатган эди.
Комила Одилова тайёрлади
