Истанбулда 250 дан ортиқ меҳмонхона ёпилмоқда

Туркиянинг Истанбул шаҳрида 250 дан ортиқ меҳмонхона ёпилиши ҳақида қарор қабул қилинди. Бу чора-тадбирлар Картақлая тоғ-чанғи курортида юз берган ҳалокатли ёнғиндан кейин ўтказилган текширувлар натижасида қабул қилинди.

 

Истанбул губернатори Давут Гюл барча тураржой лицензиясиз меҳмонхоналарни ёпиш тўғрисида фармон имзолади. Ўтказилган текширувларда шаҳарнинг 12 та туманида жами 253 та меҳмонхона қонуний фаолият юритаётгани ва хавфсизлик қоидаларига, жумладан, ёнғин хавфсизлигига риоя қилмаётгани аниқланди.

 

Энг кўп ҳуқуқбузарликлар хорижий сайёҳлар орасида машҳур бўлган Беёғлу туманида (64 меҳмонхона) қайд этилди. Кейинги ўринларда Бейкоз (46 меҳмонхона) ва Арнавуткўй (40 меҳмонхона) туманлари турибди.

 

Расмий маълумотларга кўра, барча қоидабузар меҳмонхоналар ёпилиб, 3 февралгача муҳрланади.

 

Эслатиб ўтамиз, 21 январь куни Болу вилоятидаги Картақлая курортидаги ҳашаматли меҳмонхонада ёнғин содир бўлди. Қурбонлар сони 78 кишига етган. Ёнғин сабаблари расман эълон қилинмаган бўлсада, оммавий ахборот воситалари воқеа ошхона ҳудудида бошлангани, грилдаги иссиқ мой алангаланиб кетгани ҳақида хабар бермоқда. Меҳмонхона ходимларининг 15 нафари қўлга олинган.

 

Комила Одилова тайёрлади