Эрдоған зилзилаларга тайёргарлик кўришга чақирди

Туркия президенти Ражап Тоййип Эрдоған шаҳарлар раҳбариятини бўлажак офатлар жиддий зарар келтирмаслиги учун ўз аҳоли пунктларини кутилаётган зилзилага тайёрлашга чақирди.

 

“Туркиядаги аҳоли пунктлари, биринчи навбатда Истанбул ва бошқа вилоятлардаги аҳолиси ва маъмурлар яқин орада содир бўлиши кутилаётган зилзилаларга олдиндан тайёргарлик кўришлари керак”, дея баёнот берди мамлакат президенти Ражаб Тоййиб Эрдоған.

 

Аввалроқ сўнгги бир неча кун ичида Эгей денгизида ер силкинишлари қайд этилган эди. Туркия раҳбарининг сўзларига кўра, ушбу сейсмик ҳодисалар Туркия учун энг муҳим вазифа-зилзилаларга тайёргарлик кўриш эканлигини яна бир бор эслатади.

 

“Маҳаллий маъмуриятлар сиёсий манфаатлар кўзлашдан кўра шаҳар муҳитини ўзгартириш лойиҳалари орқали шаҳарларни зилзилаларга тайёрлашлари керак” дейди Эрдўған.

 

Президент Туркиянинг барча шаҳарларини, биринчи навбатда Истанбулни зилзилага чидамли қилиш йўлида ҳаракат қилишдан бошқа муқобил вариантлари йўқлигини қўшимча қилди.

 

Шуни таъкидлаш керакки, турк сейсмологлари Истанбул яқинидаги Мармар денгизида кучли зилзила содир бўлиш эҳтимоли жуда юқори деб ҳисоблашади ва бу ҳар йили ортиб бормоқда. Гап шундаки, бу ҳудудда иккита тектоник ёриқлар мавжуд. Улар ҳаракатлана бошлаганда зилзила юз беради ва дастлабки ҳисоб-китобларга кўра, Истанбул аҳолисининг тўртдан бир қисми ҳаётига зомин бўлиши мумкин.

 

Комила Одилова тайёрлади