Меҳнат таътилига ҳақ тўлаш тартиби ўзгарди
Энди якшанба кунлари таътил тўловларида ҳисобга олинмайди.
Президент Шавкат Мирзиёев 13 февраль куни Меҳнат кодексига ўзгартириш ва қўшимчалар киритиш тўғрисидаги қонунни имзолади.
Янги тартибга кўра, энди якшанба кунлари меҳнат таътили давомийлиги ва унинг учун тўланадиган маблағ ҳисоб-китобида инобатга олинмайди. Бу қоида фойдаланилмаган таътиллар учун пул компенсацияларига ҳам татбиқ этилади.
Ҳақ тўланмайдиган таътилнинг умумий муддати 12 ойлик давр ичида 3 ойдан ошмаслиги керак. Илгари бу чеклов таътилдан сўнг келгуси бир йиллик даврга тааллуқли эди.
16 ёшгача бўлган ногирон фарзанди ёки 12 ёшгача бўлган икки ва ундан кўп боласи бор ота-оналар ҳамда васийлар учун иш ҳақи сақланмайдиган таътил муддати энг кўпи билан 14 кун этиб белгиланди (аввал камида 14 кун эди).
Ушбу ўзгаришлар меҳнат таътили билан боғлиқ қоидаларни аниқлаштириш ва тизимни яхшилашга қаратилган.
