Америкада иккита самолёт тўқнашиб кетди
Ҳодиса оқибатида икки киши ҳалок бўлди.
АҚШнинг Жанубий Аризонаси штатида содир бўлган икки кичик самолётнинг тўқнашуви натижасида икки киши ҳалок бўлди.
Миллий транспорт хавфсизлиги кенгаши (NTSB) маълумотларига кўра, ҳар иккала самолётда ҳам икки кишидан бўлган. Тўқнашув чоршанба куни Марана ҳудудий аэропорти яқинида, Туксон шаҳри яқинида юз берган.
Ҳодиса натижасида Cessna 172 самолёти фавқулодда қўнишни муваффақиятли амалга оширган, бироқ Lancair 360 МК II самолёти ерга қулаб, ёниб кетган. Ҳалок бўлган икки киши шу самолёт бортида бўлган, бироқ Марана полицияси айнан қайси самолётда эканлигини расман тасдиқламаган.
Сессна 172 самолёти AeroGuard учувчилик мактабига тегишли бўлиб, ушбу компания расмий вакиллари уларнинг икки учувчиси соғ-саломат эканини билдирган.
Марана шаҳри маъмурияти берган баёнотга кўра, ушбу самолётлар аэропортга доимий жойлашган эмас. Ҳодиса содир бўлганидан сўнг, ёнғин тезкорлик билан ўчирилган.
AeroGuard компанияси вакили Метт Паничас ушбу ҳалокат тафсилотларини шарҳлашдан бош тортган, бироқ компания ҳодиса бўйича расмий тергов билан ҳамкорлик қилаётганини билдирган.
"Икки инсоннинг фожиали ўлими бизни чуқур қайғуга солди. Биз уларнинг яқинлари ва оилаларига ҳамдардлик билдирамиз" – дейди у.
