Дубай шаҳзодаси Бурж Халифадан сакради
Бу экстремал спортчилар билан амалга оширилган.
Дубай валиаҳд шаҳзодаси Шайх Ҳамдан бин Муҳаммад бин Рошид Ол Мактум дунёдаги энг баланд бино-Бурж Халифадан парашютда сакради. Жасоратли сакраш акс этган видео ижтимоий тармоқларда катта эътибор қозониб, Инстаграмъда аллақачон 6 миллиондан ортиқ томоша қилинди.
Шаҳзода экстремал спортга қизиқувчилар билан биргаликда бу ҳаяжонли тажрибани бошдан кечирди. У 15 та мамлакатдан келган 31 нафар спортчи билан Бурж Халифанинг 139-қаватидан сакради. Хабарларга кўра, улар икки кун давомида махсус жиҳозланган платформадан жами 437 марта парашютда сакрашган.
Сакраш учун махсус платформа Бурж Халифанинг 139-қаватидан олти метр юқорироққа жойлаштирилган бўлиб, унда “139-чиқиш” деб ёзилган. Видеода шаҳзода ва экстремаллар ҳавога шўнғиётгани, Дубайнинг манзарасини осмондан томоша қилиш мумкинлиги акс этган.
Маълум қилинишича, Бурж Халифадан парашютда сакраш бўйича илк фестиваль 2014 йилда ташкил этилган. Ўшандан бери бу анъана экстремал спорт ихлосмандлари орасида катта қизиқиш уйғотиб келмоқда.
