Колумбиялик эркак сочи остига наркотик яширди
Унинг бу қилмиши аэропортдаги текширувда фош бўлди.
40 ёшли колумбиялик эркак Картагена – Амстердам рейсида 200 грамм кокаин яширишга урингани учун қўлга олинди.
Rafael Nunyos халқаро аэропорти ходимлари унинг калта қирилган бошига ёпиштирилган 19 дона кокаин капсуласи (тахминий қиймати 10 000 евро ёки 8 290 фунт) ни парик остидан топишди. У гиёҳванд моддалар савдоси ва олиб юриш айби билан ҳибсга олинди.
Полиция томонидан эълон қилинган видеода пластик қопламали парик қандай кесиб очилгани ва ичидан яширин пакетлар чиққани акс этган. Жиноятчи йўловчиларни текшириш ва сканер орқали кўрикдан ўтказиш жараёнида фош этилди.
Колумбия жаҳон бозоридаги энг йирик кокаин ишлаб чиқарувчи давлатлардан бири бўлиб, 2023 йилда гиёҳванд моддалар ишлаб чиқариш 2 600 тоннага етган. Ҳукумат гиёҳванд моддалар савдосига қарши курашаётган бўлсада, мамлакат президенти Густаво Петро яқинда кокаинни виски билан солиштириб, уни фақат Лотин Америкасида ишлаб чиқарилгани сабабли ноқонуний деб аталишини таъкидлаб ўтди.
