Хитойлик сайёҳ тоғда адашиб қолди

 

Хитойнинг Шенхи провинциясидаги Тсинлин тоғларида адашиб қолган 18 ёшли сайёҳ 10 кун давомида тирик қолиш учун қор ва тиш пастаси билан озиқланган.

 

Хабар берилишича, Сун Лян исмли йигит 170 километр узунликдаги мураккаб тоғ йўлини якка ўзи босиб ўтмоқчи бўлган. Бироқ сафарнинг иккинчи кунида унинг электрон қурилмалари қувватсизланиб, у оиласи билан боғланиш имконидан маҳрум бўлган. Сайёҳ йўналишни топиш учун ирмоқ бўйлаб пастга тушишга ҳаракат қилган, лекин бир неча бор йиқилиб, ўнг қўлини синдириб олган.

 

Йигит кучли шамол ва совуқдан ҳимояланиш учун катта тош ортида қуруқ сомон ва барглардан ётоқ тайёрлаган. У ҳаётини сақлаб қолиш учун ирмоқ суви, қор ва ёнида бўлган тиш пастасини истеъмол қилишга мажбур бўлган. Ниҳоят, оиласи ташвишга тушиб, қутқарувчиларни чақиргач, 10 кундан сўнг Сун Лян қутқарилган.

 

Мазкур тоғ йўли Хитойдаги энг хавфли бешта йўналишдан бири ҳисобланади. Сўнгги 20 йил ичида бу ҳудудда 50 дан ортиқ сайёҳ бедарак йўқолган ёки ҳалок бўлган.

 

«Мен бу воқеадан кейин қўрқув ҳис қилдим», – деб ёзди Сун Лян ижтимоий тармоқларда. «Бу ҳудуд мутлақо саёҳат учун мос эмас. Шамол шу қадар кучли эдики, икки таёқ билан ҳам оёқда туришнинг иложи йўқ эди. Қор эса кўзни очишга ҳам имкон бермасди», – дея у бошқа сайёҳларга бу йўлга чиқмасликни тавсия қилган.

 

Маълумотларга кўра, қутқарув операциясида 30 дан ортиқ одам қатнашган бўлиб, унинг нархи 80 минг юань (тахминан 11 минг АҚШ доллари)ни ташкил қилган.