Битсоин нархи кескин пасайишда давом этмоқда

 

28 февраль куни Осиё бозорлари савдосида Битсоин курсининг пасайиши давом этди. Криптовалюта нархи тарихий максимумидан 25 фоизга тушиб, 82 220 долларга етди. Ушбу пасайиш сўнгги олти ҳафта ичида кузатилган энг катта йўқотишлардан бири бўлди.

 

Маълум қилинишича, бу ҳолат Доналд Трампнинг АҚШ президенти этиб сайланишидан кейин шаклланган инвесторлик кайфиятининг ўзгариши билан боғлиқ. Битсоин 20 январь куни, Трампнинг инаугурация маросими бўлиб ўтган кунда, 109 241 долларлик тарихий максимумга етган эди. Аммо кейинчалик бозор иштирокчилари Трампнинг иқтисодий сиёсати ва АҚШнинг глобал муносабатларига нисбатан кескин қарашлари туфайли хавотир билдирган.

 

Битсоиннинг пасайиши бошқа криптовалюталарга ҳам таъсир кўрсатди. Хусусан, Этҳер, Солана ва ХРП каби йирик активлар ҳам кескин тушиб кетди. Бозорнинг умумий заифлашиши инвесторларнинг таваккал қилишга бўлган иштиёқининг пасайганини кўрсатмоқда.

 

Бундан ташқари, С&П 500 индекси ҳам ҳафта давомида тушиш тенденциясини қайд этди. АҚШ истеъмолчиларининг ишонч даражасига оид салбий маълумотлар иқтисодий истиқболларга бўлган хавотирларни кучайтирган. Трампнинг Канада ва Мексикага 25 фоиз тариф жорий этиш, Хитой импортига эса 10 фоиз қўшимча бож солиш ҳақидаги баёноти эса Осиё фонд бозорларида ҳам салбий таъсир кўрсатди.

 

Ҳозирда криптовалюта бозори глобал иқтисодий ва сиёсий ўзгаришларга сезгир бўлиб, инвесторлар эҳтиёт чораларини кўришга мажбур бўлмоқда. Бозордаги келажакдаги тенденциялар эса иқтисодий сиёсат ва глобал молия бозорлари ҳаракатларига боғлиқ бўлиши кутилмоқда.