Америкада Трамп тасвирланган доллар чиқарилиши мумкин
Бу инфляция туфайли нақд пулга талаб ошгани билан боғлиқ.
Жанубий Каролинадан сайланган республикачи конгрессмен Жо Уилсон АҚШда янги 250 долларлик банкнота чиқариш таклифини илгари сурди. Унинг ташаббусига кўра, ушбу банкнотада собиқ президент Доналд Трампнинг сурати жойлаштирилиши керак.
Уилсон ўз таклифини Х (собиқ Твиттер) ижтимоий тармоғида эълон қилиб, бу ғоя Байден маъмурияти даврида инфляция ошгани сабабли нақд пулга бўлган эҳтиёж ортиб бораётгани билан боғлиқлигини таъкидлади.
Аммо АҚШ қонунчилигига кўра, 1866 йилдан бери тирик шахсларнинг тасвирларини банкнот ва тангаларга жойлаштириш тақиқланган. Шу сабабли бу таклифнинг амалга ошиши эҳтимоли паст.
