Исроил Ғазога кирадиган барча гуманитар юкларни тўхтатди

 

2 март куни Исроил Ғазо секторига ҳар қандай гуманитар ёрдам киришини бутунлай тўхтатди. Бу ҳақда Исроил Бош вазири девонхонаси маълум қилди.

 

Исроил расмийлари маълумотларига кўра, ушбу қарор асосий асирларни алмашиш келишуви якунлангани ва ҲАМАСнинг АҚШ махсус вакили Стив Уиткофф таклифларини рад этгани сабаб қабул қилинган. Натижада, 2 март тонгидан бошлаб Ғазога бирорта ҳам юк киритилмаяпти.

 

ҲАМАС ҳаракати бу қарорни кескин қоралаб, уни ҳарбий жиноят ва сулҳ келишувига жиддий зарба деб атади.

 

– Нетаняхунинг гуманитар ёрдамни тўхтатиш қарори – босим ўтказиш, ҳарбий жиноят ва сулҳ бўйича келишувга зарар етказиш билан тенг, – дейилади ҲАМАС баёнотида.

 

Ушбу ҳаракат халқаро ҳамжамият ва воситачи давлатларни Исроилга босим ўтказишга чақириб, Ғазодаги 2 миллиондан ортиқ инсоннинг оғир аҳволига барҳам бериш чораларини кўришга ундади.

 

ҲАМАС, шунингдек, Исроил ҳукумати АҚШнинг Рамазон ва яҳудийларнинг Пасха байрами (12-20 апрель) даврида вақтинчалик сулҳ таклифини қабул қилганини эслатиб ўтди.

 

Улар Нетаняхуни "ички сиёсий манфаатларини кўзлаб, асирлар ва Ғазо аҳолиси ҳаёти эвазига янги инқироз яратишда" айблади.

 

Ғазо секторида давом этаётган тахминан 17 ойлик ҳарбий ҳаракатлар натижасида ҳудуднинг катта қисми вайронага айланган, 45 мингдан ортиқ инсон ҳалок бўлган ва аксарият аҳоли оғир турмуш шароитида яшашга мажбур бўлиб қолган.