Лондонда Украина бўйича муҳим музокара бўлиб ўтди

 

Буюк Британия Бош вазири Кир Стармер ва Украина Президенти Владимир Зеленский Лондонда учрашиб, икки томонлама музокаралар ўтказди. Бу учрашув Украина бўйича саммит арафасида бўлиб ўтди.

 

Зеленский 1 март куни Британия ҳукуматининг расмий қароргоҳига ташриф буюрди. Учрашув бир соат давом этди ва ундан сўнг Стармер меҳмонини автомобилигача кузатиб қўйди.

 

Мулоқот давомида Буюк Британия Бош вазири Қиролликнинг Украинага бўлган қатъий қўллаб-қувватлови ҳақида гапирди:

– Эшитиб турганингиздек, ташқаридан келаётган овозлар бутун мамлакатдаги хайрихоҳликнинг исботи. Биз сиз биланмиз ва Украина билан бирга қоламиз, – деди Стармер.

 

У Буюк Британия Украинага ёрдам беришда давом этишини таъкидлаб, Киевнинг суверенитети ва хавфсизлиги Европадаги барқарор тинчликнинг гарови эканини қайд этди.

 

Ўз навбатида, Зеленский Британия ҳукумати ва фуқароларига кўрсатиб келаётган ёрдами учун миннатдорлик билдирди. Шунингдек, у ташрифи давомида Қирол Чарлз ИИИ билан ҳам учрашиш ниятида эканини маълум қилди.

 

– Биз сиздан қўллаб-қувватлов кутамиз, – деди Украина Президенти қароргоҳни тарк этаркан.

 

Украина ОАВ хабарларига кўра, Буюк Британия Киевнинг мудофаа эҳтиёжлари учун 2,6 миллиард фунт-стерлинг миқдорида молиявий келишув имзолаган.

 

Зеленский АҚШда Доналд Трамп билан баҳсга киришганидан сўнг Лондонга етиб келди. Бугун эса Буюк Британия пойтахтида Украина бўйича муҳим саммит бўлиб ўтиши режалаштирилган.