Украинада туғилиш даражаси рекорд даражада пасайди
Бу миллатнинг қаришига олиб келади.
Украинада туғилиш даражаси тарихий минимумга етди – ҳар бир аёлга атиги 0,9 бола тўғри келмоқда. Бу ҳақида Украина ижтимоий сиёсат вазирининг биринчи ўринбосари Дариа Марчак “Украинанинг демографик келажаги: барқарорлик ва тикланиш стратегияси” конференциясида маълум қилди.
Мутахассисларнинг таъкидлашича, бу Украина тарихидаги энг паст туғилиш даражаси ҳисобланади. Таққослаш учун, халқаро стандартга кўра, аҳолининг табиий ўсиши учун ҳар бир аёлга камида 2,2 бола тўғри келиши лозим, Европа Иттифоқида эса бу кўрсаткич ўртача 1,5 боланинг атрофида.
Туғилишнинг паст даражаси кенг кўламли ташқи миграция билан бирга миллатнинг қаришига олиб келади.
Натижада, украиналикларнинг ўртача ёши 41 дан 45 гача кўтарилди, бу аҳолининг тез қаришини кўрсатади. Бугунги кунда Украинада нафақахўрлар ва ишлайдиган одамлар нисбати 1:1 ни ташкил қилади ва келажакда бу тенденция янада ёмонлашиши мумкин.
