ҲАМАС асирларни ўлдириш билан таҳдид қилди
Музокаралар ҳануз давом этмоқда.
Фаластиндаги ҲАМАС ҳаракати Исроил Ғазо секторида ҳарбий ҳаракатларни қайта бошласа, қўлга олинган асирларнинг бир қисмини ўлдириш билан таҳдид қилди. ҲАМАС вакили Абу Убайда ўз мурожаатида "Фаластин халқига қарши тажовузнинг ҳар қандай кучайиши асирларнинг ўлимига олиб келади", дея таъкидлади.
Исроил расмийлари маълумотларига кўра, ҳозирда ҲАМАС гуруҳи 24 кишини гаровда ушлаб турибди ва 35 кишининг жасадини ўзида сақламоқда. Асирлар орасида Исроил ва Германия фуқаролигига эга бўлган аскар ҳамда Таиланд фуқароси борлиги айтилмоқда.
Аввалроқ, гаровга олинган шахсларнинг ҲАМАС ва бошқа исломий гуруҳлар томонидан шафқатсиз муносабатга дуч келгани ҳақида маълумотлар тарқалган эди. Ҳозир ҳам асирликда қолаётганларнинг оилалари вақт ўтиб бораётгани ва уларнинг тақдири мавҳумлигидан хавотир билдирмоқда.
Маълумки, Исроил ва ҲАМАС ўртасида 1 март куни бошланган сулҳнинг биринчи босқичи якунланди, бироқ томонлар келишувни узайтириш масаласида ҳануз музокараларни давом эттирмоқда. Агар ҲАМАС гаровга олинганларни озод қилиш жараёнини давом эттирмаса, Исроил ҳарбий ҳаракатларни қайта тиклашга ва ҲАМАСга босимни кучайтиришга тайёр эканини билдирган.
