Австрияда мактабларда телефондан фойдаланиш чекланди
Тақиқ бузилганда ўқувчиларга чора кўрилади.
Австриянинг янги таълим вазири Кристоф Видеркер бошланғич ва ўрта мактабларда мобил телефонлардан фойдаланишни тақиқлашини эълон қилди. Бу янги қоидага кўра, ўқувчилар дарс пайтида ҳам, танаффусда ҳам уяли телефон ишлата олмайди.
Илгари мактаблар ўз ҳудудида мобил қурилмалардан фойдаланишни чеклаш ёки тақиқлаш бўйича мустақил қарор қабул қилиш ҳуқуқига эга эди. Аммо Видеркернинг қарори билан бу тақиқ бутун мамлакат бўйлаб мажбурий қоидага айлантирилади. Янги тартиб март ойи охиригача Австрия Таълим вазирлигининг қарори билан расмийлаштирилиши кутилмоқда.
Матбуот анжуманида таълим вазири ушбу чеклов бўйича мутахассислар билан маслаҳатлашганини ва мактабларда мобил телефонлардан фойдаланишнинг салбий таъсири ҳаттоки коронавирус пандемиясидан ҳам каттароқ экани аниқланганини таъкидлади. Шунингдек, мактаблар ўқувчиларнинг телефонларини қаерда сақлашни мустақил белгилаш ҳуқуқига эга бўлади, тақиқ бузилганда эса ўқувчиларга тегишли чоралар кўрилади.
Мобил қурилмаларга бўлган бундай чеклов Европанинг кўплаб мамлакатларида ҳам муҳокама қилинмоқда ёки аллақачон амалиётга жорий этилган. Австриянинг янги қоидалари эса ёшларнинг дарсга эътиборини ошириш ва таълим сифатини яхшилашга қаратилган.
