Жидда шаҳрида АҚШ ва Украина расмийлари стратегик музокаралар ўтказмоқда
Учрашувда Россия билан келишув масаласи муҳокама қилинади.
Саудия Арабистонининг Жидда шаҳрида АҚШ ва Украина делегациялари ўртасидаги музокаралар бошланди. Учрашувда Украинадан президент девони раҳбари Андрей Ермак, ташқи ишлар вазири Андрей Сибиха ва мудофаа вазири Рустем Умеров иштирок этмоқда. АҚШ томонига эса Давлат котиби Марко Рубио ва Миллий хавфсизлик бўйича маслаҳатчи Майк Вальс бошчилик қилмоқда.
Музокаралар кун тартибидаги асосий мавзулардан бири – Украинанинг Россия билан можарони тинч йўл билан ҳал қилиш бўйича ташаббусларга тайёрлиги. Томонлар, шунингдек, ҳарбий ёрдам, хавфсизлик кафолатлари ва минтақавий барқарорлик масалаларини ҳам муҳокама қилиши кутилмоқда.
Ушбу учрашув Украина ва унинг ғарбий иттифоқчилари ўртасидаги стратегик ҳамкорликни муҳокама қилиш учун муҳим платформа бўлиши мумкин. Таҳлилчиларга кўра, музокаралар натижаси келгуси дипломатик ҳаракатларга таъсир кўрсатиши мумкин.
Ҳозирча учрашув тафсилотлари тўлиқ ошкор қилинмаган, бироқ томонлар натижалари бўйича расмий баёнот бериши кутилмоқда.
