Украина дунёдаги энг йирик қурол импортчисига айланди
Камида 35 давлат Украинага қурол етказиб берган.
SIPRI тадқиқотига кўра, Украина 2020-2024 йилларда дунёнинг энг катта қурол импортчиси бўлди. Ушбу давр мобайнида жаҳон қурол импортининг 8,8 фоизи Украина ҳиссасига тўғри келган.
Россиянинг кенг кўламли босқини бошланганидан буён камида 35 давлат Украинага қурол етказиб берган. Етказиб берувчиларнинг энг йириклари АҚШ (45%), Германия (12%) ва Полша (11%) бўлиб, Украина қурол импорти бўйича Европадаги энг йирик давлатга айланган.
SIPRI мутахассисларига кўра, европа давлатлари Россия таҳдидига жавобан қуролланиш жараёнини сезиларли даражада оширган. 2020-2024 йилларда НАТОга аъзо европа давлатларининг қурол импорти аввалги беш йиллик даврга нисбатан 105 фоизга ошди.
Россия эса сўнгги йилларда қурол экспортида катта йўқотишларга дуч келган. 2020-2024 йилларда Россиянинг қурол савдоси 2015-2019 йилларга нисбатан 64 фоизга камайди. Бунга урушнинг давом этиши, иқтисодий санкциялар ва қурол ишлаб чиқаришдаги муаммолар сабаб бўлган.
