«Х» платформасига кенг кўламли киберҳужум уюштирилди
Илон Маск бу Украина томонидан уюштирилган деб ҳисобламоқда.
10 март куни «Х» ижтимоий тармоғи кенг кўламли киберҳужумга учради, натижада платформанинг ишлашида муаммолар юзага келди. Бу ҳақда Илон Маск ўзининг аккаунтида маълум қилди.
Унинг сўзларига кўра, бу ҳужум платформага ҳар куни йўлланадиган одатий кибертаҳдидлардан анча каттароқ ва мувофиқлаштирилган бўлган. Маск ИП-манзиллар Украина вилоятларига ишора қилаётганини айтиб ўтди, бироқ аниқ тафсилотлар ҳозирча номаълум.
«Х» ижтимоий тармоғидаги носозликлар бир қанча мамлакатларда кузатилган. Айрим фойдаланувчилар платформага умуман кира олмаган бўлса, бошқалари постларни жойлаш ёки кўриш имкони йўқлигидан шикоят қилган.
Ҳозирча компания расмий баёнот бермаган, аммо мутахассислар ушбу ҳужум ортида жиддий кибергуруҳ ёки ҳатто бутун бир давлат турган бўлиши мумкинлигини тахмин қилмоқда.
