Украина 30 кун давомида тўлиқ ўт очишни тўхтатишга тайёр
Владимир Зеленский Американинг таклифни қўллаб-қувватлади.
Украина президенти Владимир Зеленский АҚШнинг 30 кунлик оташкесим ўрнатиш таклифини қабул қилишга тайёрлигини маълум қилди. У, Киев ва Вашингтон вакилларининг Саудия Арабистонида ўтказган музокаралари натижасини изоҳлади ва АҚШнинг Россияни бу таклифни қабул қилишга ишонтириши кераклигини айтди.
Зеленский Киев музокараларда учта асосий таклифни илгари сурганини таъкидлади: “осмонда тинчлик”, “денгизда тинчлик” ва “маҳбусларни озод қилиш”. У АҚШнинг бу таклифларни тушунганини ва қабул қилганини билдирди, шунингдек, Президент Трампга конструктив суҳбат учун миннатдорчилик билдирганини айтди.
“Америка тарафидан биринчи қадамни қўйиш таклифи бўлди – нафақат Қора денгизда, балки бутун фронт бўйлаб 30 кун давомида ўт очишни тўхтатишга ҳаракат қилишни сўрашди. Украина бу таклифни қабул қилади ва ижобий баҳолайди”, – деган Украина раҳбари.
Шунингдек, Зеленский Россия бу таклифни қабул қилса, оташкесим бошланишини қўллаб-қувватлашини маълум қилди.
