Россияда она икки яшар ўғлини «тинчлантириш» баҳонасида ўлдирди
Она боласига гиёҳванд моддалар укол қилган.
Россиянинг Челябинск вилоятидаги Миасс шаҳрида 31 ёшли она ўзининг икки яшар ўғлини «тинчлантирувчи» баҳонасида гиёҳванд моддалар укол қилиб ўлдирди. Фожиа январь ойида содир бўлган бўлсада, чақалоқнинг ўлимига аниқ сабаблар энди ойдинлашган.
Россия Тергов қўмитасининг маълумотига кўра, боланинг жасади 22 январга ўтар кечаси уйидан топилган. Суд-тиббий экспертиза чақалоқ гиёҳванд моддалар аралашмасидан заҳарланиб вафот этганини тасдиқлади. Тергов давомида аёл ўғлининг йиғисига дош бера олмай, уни тинчлантириш мақсадида бир неча марта гиёҳванд моддаларни укол қилгани маълум бўлган.
Ҳозирда унга нисбатан “Вояга етмаган болани қасддан ўлдириш” моддаси бўйича жиноят иши қўзғатилган. Суд уни ҳибсга олиш тўғрисида қарор чиқарган. Шунингдек, оилада яна уч нафар бола борлиги аниқланиб, уларнинг яшаш шароити ва фаровонлиги бўйича текширув ўтказилмоқда.
Статистик маълумотларга кўра, Россияда ҳар йили юзлаб болалар ота-оналари томонидан зўравонлик қурбонига айланади. 2020 йилда бундай ҳолатлар сони 1674 тага етган, улардан 105 нафари эса ҳалок бўлган. Мутахассисларнинг фикрича, пандемия ва унинг асоратлари оилалардаги стрессни кучайтириб, вазиятни янада оғирлаштирган.
