Доғистонда зирҳли транспортёр енгил автомобилни босиб ўтди
Оқибатда автомобиль ҳайдовчиси ҳалок бўлган.
Доғистон Республикасининг Махачқалъа шаҳрида оғир йўл-транспорт ҳодисаси содир бўлди. Ҳарбий зирҳли транспортёр (БТР) ЛАДА Приора русумли енгил автомобиль устидан юриб ўтган. Гувоҳларнинг сўзларига кўра, ҳодиса Қорабудахкент трассасида, пиёдалар ўтиш жойи яқинида содир бўлган.
Воқеа жойидан олинган видеокадрларда кўплаб одамлар йиғилгани, оқ рангли автомобиль бутунлай эзилган ҳолда ётгани акс этган. Машинанинг олд ва орқа қисми буткул бузилган, унинг танаси эса босим натижасида бутунлай деформацияга учраган.
Дастлабки маълумотларга кўра, автомобиль ичида бўлган шахс оғир жароҳатлар олиб, воқеа жойида ҳалок бўлган.
Ҳодисанинг аниқ сабаблари ҳозирда ҳуқуқ-тартибот органлари томонидан ўрганилмоқда. Тергов ҳаракатлари бошланган бўлиб, воқеа тафсилотлари расман эълон қилиниши кутилмоқда.
