Туркияда шифокор аёлларни ҳомиладорликка ишонтириб, фирибгарлик қилган

 

Туркиянинг Ширнак вилоятида гинеколог бўлиб ишлаган İсмет Бесен исмли шифокор аёлларни ёлғон ҳомиладорликка ишонтириб, кейинчалик уларга ҳомиладорлик тугамаганини айтган ва пул эвазига аборт қилган. Бу мудҳиш жиноят ортидан олиб борилган тергов натижасида ўнлаб аёллар жабрлангани маълум бўлди.

 

Тергов натижаларига кўра, 58 ёшли шифокор беморларига махсус дори воситаларини берган, бу эса ҳомиладорлик тестларини сохталаштириб, аёлларга ҳомиладорлик ҳиссини пайдо қилган. Кейинчалик у чақалоқ бачадонда вафот этганини айтиб, сунъий аборт амалиётини ўтказган ва шу орқали катта миқдорда пул ишлаб топган.

 

Фирибгарлик Бюроси томонидан олиб борилган терговда 12 нафар жабрланувчи аёл гувоҳлик берди. ДНК таҳлиллари натижасида шифокор операция қилган аёлларнинг ҳомилалари уларга тегишли эмаслиги аниқланди. Шунингдек, шифокорнинг Ширнак, Айдин ва Измир шаҳарларида жойлашган клиникаларида ҳам текширувлар ўтказилди ва натижада İсмет Бесен ҳамда унинг 4 нафар ёрдамчиси қўлга олинди.

 

Бесен 14 февраль куни расмий равишда ҳибсга олинган ва унга “йирик миқёсдаги фирибгарлик” айби қўйилган.

 

Тергов давомида Бесеннинг аввал ҳам ноқонуний ишларга қўл ургани аниқланган. У 2006 йилда “Йил шифокори” унвонини олган бўлсада, 2007 йилда дори воситалари билан боғлиқ фирибгарлик учун ҳибсга олинган. Ҳозирда ушбу иш бўйича 3 та клиника ва 9 та дорихонанинг эгалари ҳам тергов остида.

 

Шифокорнинг фаолияти текширилганда, фақат 7 ой ичида 25 мингдан ортиқ беморни қабул қилгани ва уларга турли дорилар ёзиб бергани аниқланган. 2005 йилда эса у Силопи Давлат касалхонасида кунига ўртача 171 беморни қабул қилиб, рецепт ёзган. Бундан ташқари, тергов жараёнида Бесеннинг Анқарада 15 та кўчмас мулкка эгалиги ҳам маълум бўлган.