Англияда малакасиз жарроҳ беморларнинг ҳаётига зарар етказди
У нотўғри операциялар туфайли 91 беморнинг ҳаётини хавфга қўйган.
Англияда малакасиз жарроҳ 91 нафар беморга нотўғри тиббий муолажалар ўтказиб, уларнинг соғлиғига жиддий зарар етказган.
Жабрланганлардан бири, 51 ёшли Анжела Гловернинг сўзларига кўра, 2018 йилда Уолсоллдаги давлат касалхонасида ишлаган жарроҳ Миан Мунавар Шоҳ унинг елкасига нотўғри ташхис қўйиб, асоссиз операция ўтказган. Аёлнинг фақат мушак ёрилиши бўлишига қарамай, жарроҳ унга металл пинлар қўйган. Натижада у умрбод оғриқда яшашга мажбур бўлган.
Тергов натижаларига кўра, доктор Шоҳ 91 беморда нотўғри операциялар бажарган. У мураккаб суяк операцияларини амалга ошириш учун етарли малакага эга бўлмаган бўлсада, суякларни олиб ташлаш, винтлар ўрнатиш ва протез жойлаштириш каби жарроҳлик амалиётларини бажарган.
Касалхона директори жабрланган беморлар ва уларнинг оилаларидан расман узр сўради. Ҳозирча жарроҳ қандай жавобгарликка тортилиши ва беморлар етказилган зарар учун компенсация олиши-олмаслиги номаълумлигича қолмоқда.
