АҚШда кучли бўрон ва торнадо кузатилди
Оқибатда 16 киши ҳалок бўлган.
АҚШнинг Ўрта Ғарбий ва жанубий ҳудудларида кучли бўрон ва торнадолар содир бўлиб, камида 16 кишининг ҳаётига зомин бўлди. НБС Невс телеканалининг хабар беришича, табиий офат энг кўп талафот етказган штатлар Миссури, Арканзас ва Техас бўлиб, у ерда қурбонлар ва жароҳатланганлар сони ортиб бораётгани айтилмоқда.
Дастлабки маълумотларга кўра, Миссурида 10 киши, Арканзас ва Техасда эса 3 нафардан одам ҳалок бўлган. Арканзаснинг саккиз графлигида 29 киши жароҳатланган, Миссурида эса 316 мингдан ортиқ мижоз электр таъминотисиз қолган. Табиий офат йўлларни тўсиб қўйган, уйлар ва инфратузилмаларга жиддий зарар етган.
Расмийлар бошқа штатларда ҳам торнадо хавфи юқори эканини билдирди. Миллий об-ҳаво хизмати аҳолига ҳушёрликни ошириш ва хавфсизлик чораларини кўришни тавсия қилди. Қутқарув хизматлари вайроналар остида қолганларни қидириш ишларини давом эттирмоқда.
Мутахассисларнинг фикрича, бу йил АҚШда торнадолар мавсуми одатдагидан тез бошланиб, табиий офатлар сони ва кучи ошиши мумкин. Айни пайтда фавқулодда вазият хизмати аҳолига ёрдам бериш учун қўшимча ресурсларни сафарбар қилмоқда.
