Павел Дуров суд рухсати билан Францияни тарк этди

 

Телеграм асосчиси Павел Дуров, унга нисбатан очилган жиноий иш доирасида Франциядан чиқиш учун суддан рухсат олиб, Дубайга учиб кетди.

 

Манбаларга кўра, терговчи Дуровга бир неча ҳафтага Францияни тарк этишга рухсат берган. У аввалроқ 2024 йил 24 август куни Озарбайжондан келганида Парижнинг Ле Бурже аэропортида қўлга олинган эди.

 

Франция прокуратураси маълумотига кўра, Дуровга нисбатан тергов 2024 йил февраль ойида бошланган. Суд уни 5 миллион евро гаров эвазига озод қилган, бироқ назорат остида қолдириб, барча паспортларини мусодара қилган. У Россия, Франция, БАА ва Сент-Китс ва Невис фуқароси ҳисобланади.

 

Франция ҳукумати Дуровни қуйидаги жиноятларга алоқадорликда гумон қилмоқда:

• Уюшган гуруҳ таркибида ноқонуний фаолият юритиш учун онлайн платформани бошқариш;
• Ваколатли органларнинг сўровига биноан ҳужжатлар ёки маълумотларни тақдим этмаслик;
• Вояга етмаганлар билан боғлиқ порнография, гиёҳванд моддаларнинг ноқонуний савдоси ва фирибгарликка шериклик;
• Расмий декларациясиз крипто хизматларини кўрсатиш ва олиб кириш.

 

Франция адвокатлари бу жараён камида уч ёки тўрт йил давом этиши мумкинлигини тахмин қилмоқда. Шу билан бирга, Дуров суд назорати шартларини юмшатиш бўйича терговчига мурожаат қилиш ҳуқуқига эга.