АҚШ Эрон ва Хитойга нисбатан босимни кучайтирди
АҚШ Эрон нефтини сотиб олгани учун Хитой компанияларига санкция жорий қилди.
АҚШ ҳукумати Хитойнинг икки нефть-кимё компаниясига санкция жорий қилди. Вашингтон уларни Эрон нефтини импорт қилгани ва АҚШнинг мавжуд санкцияларини четлаб ўтгани учун жазолади.
АҚШ Давлат департаменти маълумотига кўра, Ҳуайинг Ҳуизҳоу Дая Бай терминали санкциялар остидаги кемалардан Эрон нефтини қабул қилиб, Хитойга етказган. Луқинг Петрочемисал эса Эрон ва ҳутийлар билан боғлиқ кемалар орқали нефть сотиб олгани учун чекловга учради.
АҚШ Молия вазири Скотт Бессент бу ҳаракатларни Эронни молиявий жиҳатдан заифлаштиришга қаратилган қадам сифатида изоҳлади. Унинг таъкидлашича, Эрон нефтидан тушадиган даромад терроризмни молиялаштириш ва ядровий дастурини ривожлантириш учун ишлатилмоқда.
Шу ойда АҚШ президенти Доналд Трамп Эрон олий раҳбарига ядровий келишув бўйича музокаралар олиб боришни таклиф қилган эди. Бироқ Теҳрон ҳали бу таклифга жавоб бермади. Вашингтон Эрон нефтини Хитойга етказиб берувчи компанияларга санкцияларни кенгайтириб, Теҳронни музокаралар столига ўтиришга мажбурлашга уринмоқда.
АҚШ Молия вазирлиги яна 19 та компания ва бир нечта Хитой ҳамда Гонконгда жойлашган кемалар эгаларига қарши янги санкциялар жорий қилганини ҳам эълон қилди.
