Лондоннинг энг йирик аэропорти вақтинча ёпилди
Бунга электр узилиши сабаб юзага келган ёнғин сабаб бўлган.
Лондондаги Хитроу аэропорти электр подстанциясида содир бўлган ёнғин оқибатида вақтинча ёпилди. Ҳодиса натижасида бутун аэропорт инфратузилмаси ишдан чиқди, рейслар номаълум муддатга кечиктирилди.
Аэропорт маъмуриятининг хабар беришича, электр таъминоти узилишлари сабабли йўловчилар ва ходимларнинг хавфсизлигини таъминлаш мақсадида Хитроу 21 март соат 23:59 гача ёпилган. Шунингдек, яқин кунларда ҳам парвозлар жадвалида жиддий узилишлар кузатилиши мумкин.
Маълумотларга кўра, ҳозирча келаётган рейслар қаерга йўналтирилиши аниқ эмас. Йўловчиларга аэропорт қайта очилгунча унга келмаслик тавсия қилинган.
Ёнғин Хейс ҳудудида юз берган портлашдан сўнг бошланган бўлиб, воқеа жойида кучли алангалар юзага келган. Маҳаллий ҳукумат хавфсизлик чоралари доирасида аҳоли ва яқин атрофдаги корхоналар ишчиларини эвакуация қилишга қарор қилган.
Ҳодиса оқибатида 16 мингга яқин одам электр таъминотисиз қолган.
