Mercedes-Benz автомобиллари энди роботлар томонидан йиғилади
Ушбу одамсимон роботлар ёрдамида ишлаб чиқариш самарадорлигини ошириш мумкин.
Mercedes-Benz Берлиндаги заводида АҚШнинг Апплоник компанияси томонидан ишлаб чиқилган одамсимон роботларни синовдан ўтказишни бошлади.
Маълумотларга кўра, Аполлон роботлари заводнинг ички логистика жараёнларини автоматлаштириш учун жорий этилмоқда. Ушбу роботлар автомобиль қисмларини ишлаб чиқариш линиясига етказиб бериш, ишчиларга улардан самарали фойдаланишда ёрдам бериш ва компонентларнинг дастлабки сифатини текшириш каби вазифаларни бажаради.
Бундан ташқари, Аполлон роботлари ўзини қувват манбаига улаш орқали автоматик тарзда заряд қилиш қобилиятига эга. Бу уларнинг узлуксиз ишлашига ва ишлаб чиқариш жараёнининг янада самарали бўлишига ёрдам беради.
Экспертларнинг фикрича, Mercedes-Benz томонидан ушбу технологиянинг жорий этилиши автомобиль саноатида автоматлаштиришнинг янги босқичини бошлаб бериши мумкин. Шу билан бирга, заводдаги ишчилар билан ҳамкорликда ишлашга мўлжалланган бу роботлар инсон омили ва замонавий технологиялар уйғунлигининг ёрқин намунаси бўлиб хизмат қилади.
