Террорчилар Нигерда масжидга ҳужум қилди
Ҳужум оқибатида 44 киши ҳалок бўлди.
Нигер ҳукумати мамлакат жануби-ғарбидаги қишлоқда содир бўлган фожиа муносабати билан уч кунлик мотам эълон қилди. “Исломий давлат”нинг Катта Саҳрои Кабирдаги бўлими (ИСГС) томонидан амалга оширилган ҳужум оқибатида 44 киши ҳалок бўлди, 13 киши жароҳат олди.
Ички ишлар вазирлиги хабарига кўра, ҳужум 21 март куни Кокору коммунасининг Фонбита қишлоғида жойлашган масжидда содир бўлган. Террорчилар тинч аҳолига қарата ваҳшийларча ҳужум уюштирган, натижада қурбонлар орасида кўплаб тинч фуқаро бўлган.
Расмийлар воқеани кескин қоралаб, терроризмга қарши курашни кучайтиришга ваъдалар бермоқда. Сўнгги йилларда Нигер ва қўшни давлатлар ушбу ҳудудда фаолият юритаётган экстремистик гуруҳларнинг ҳужумларига дуч келмоқда.
